AKVA-konsernin fingið krav um loysipening eftir umfatandi virusálop
Mánamorgunin bleiv tað alment, at framleiðarin av útgerð á Bryne í Noregi er rakt av einum umfatandi telduvirusálopi. Stjórin í AKVA-konsernini, Knut Nesse, sigur við Dagens Næringsliv, at talan er um eitt virus, har loysipeningur verður kravdur.
– Hetta minnir nógv um sakina frá Østre Toten-kommununi. Tey, sum hava álopið okkum, hava fingið fatur í okkara framleiðsludata, ERP-skipanina. Skipanin er blokerað, og eitt sokalla loysipeningavirus er sett inn í skipanina, sigur Knut Nesse eisini við Dagens Næringsliv.
Knut Nesse vil ikki siga, hvussu nógvur peningur verður kravdur, ella um konsernin fer at gjalda.
– Vit hava operatiónir í gongd í tíggju londum, og tænasturnar eru ymiskar. Summar virka, sum tær skulu, aðrar virka lutvíst, og so eru aðrar, sum als ikki virka. Tað er virksemið í Noregi, sum er harðast rakt, sigur hann.
Millum skipanirnar, sum eru raktar, er forritanarvøran Fishtalk, sum AKVA-konsernin veitir nógvum alarum.