Eftir ein tryggan 4-0 sigur móti 07 Vestur á heimavølli, so er tað nú komið hartil, at KÍ kann vinna FM komandi umfar.

Til tað krevst, at KÍ vinnur móti ÍF í Fuglafirði, meðan Víkingur ikki fær fult móti 07 Vestur í Sørvági.

Dagsins dystur í Klaksvík var einvegis ferðsla, har KÍ sat á øllum frá byrjan til enda. Tó skal 07 Vestur fáa rós fyri at spæla fyri sínum møguleika við at stríðast og verja væl. KÍ spældi væl afturi á vøllinum, men ímun til hvussu nógvar støður vóru, so manglaði neyvleikin ofta í avgerandi støðunum. Hóast hetta, so vann KÍ ein uppibornan 4-0 sigur og tað var í tráð við dystin. Málskjúttar vóru Jóannes Bjartalíð (2), Árni Frederiksberg og Páll A. Klettskarð. Uppleggini átti Jóannes K. Danielsen (2), Jóannes Bjartalíð og Bob Sumareh.

Dysturin hjálpti KÍ eisini til at útbyggja metini við at skora mál og at halda mótstøðuliðnum frá at skora.