Sonni L. Petersen, næstformaður í Ítróttarnevndini hjá Runavíkar kommunu, skrivar í kvøld á sínum facebookvanga, at hann sum næstformaður hevur frætt miðlunum, at borgarstjórin í Runarvíkar Kommunu, Torbjørn Jacobsen, arbeiðir við onkrum loysnum, ið vit fara at frætta nærri um í næstum.

Okkurt tíðir upp á, at íróttarnevndin onki veit um støðuna. Hann vísir millum annað á, at 9,1 mió. kr. eru longu brúkar higartil upp á svimjihøllina, samstundis sum avsett í alt hava verið uml. 10-12 mió. kr. seinastu tvey-trý árini.

Hóast nógvur peningur yvir eitt longri tíðarskeið er farin til tekningar av svimjihøllini, so heldur næstformaðurin, at tað er ótrúligt, at man ikki klárar at hava gjørt projektið so mikið gott, at tað ber til at bjóða uppá tað.

Eisini setir hann spurnartekin við, at tríggjar av størstu fyritøkunum í Føroyum boykotta at bjóða uppá svimjihøllina í Runavík og spyr hvør orsøkin man vera.

Til seinast spyr hann borgarstjóran beinleiðis: "Góði borgarstjóri, kanst tú forklára okkum øllum, hvat tað er, sum vit hava brúkt skattapengarnar til?"

Soleiðis skrivar Sonni L. Petersen, næstformaður í Ítróttarnevndini:

Sum næstformaður í ítróttarnevndini í Runavíkar Kommunu, ið hevur svimjihøllina um hendi, so er tað áhugavert, at man skal frætta í miðlunum, at borgarstjórin í Runarvíkar Kommunu, Torbjørn Jacobsen, arbeiðir við onkrum loysnum, ið vit fara at frætta nærri um í næstum.

Sambært almennu ársroknskapunum fyri 2018, 2019 og 2020, so hevur RK brúkt 9,1 mió til svimjihøllina. Hartil er peningur játtaður til verkætlanina í fíggjarætlanini fyri 2021 og 2022.

Tá ein kommuna hevur brúkt tvey-trý ár og eini 10-12 mió. av skattaborgarans pengum til at tekna eina svimjihøll, so er tað eftir mínum tykki ótrúligt, at man ikki hevur klárað at gjørt projektið so mikið gott, at tað ber til at bjóða uppá tað.

Tríggjar av størstu fyritøkunum í Føroyum boykotta at bjóða uppá svimjihøllina í Runavík. Orsøkin? Tilfarið er ikki gott nokk. Handverksmeistarafelagið - sum sjálvandi skal verja fakið og tryggja eitt seriøst útboð - sigur alment, at útbjóðingartilfarið var ov ógreitt, og at ‘man veit ikki hvat tað er, man bjóðar uppá’.

Um verkætlanir ikki eru nóg væl neyvlýstar, so vita vit øll - frá nógvum almennum royndum - at prísurin kemur ikki at halda. Tað koma eykarokningar.

Vit skulu hava í huga, at talan er enn bara um eitt uppskot, sum skal samtykkjast av býráðnum. Eitt søguliga dýrt og illa frágingið uppskot. Tíðin er komin til opinleika. Góði borgarstjóri, kanst tú forklára okkum øllum, hvat tað er, sum vit hava brúkt skattapengarnar til?