Visit Faroe Islands og allar Føroyar hava fingið sera nógv fyri pengarnar við TROM. Filmsarbeiðið, filmingin, panorering, nærupptøkur og klipping – alt í heimsflokki ella betri, tí slík leiktjøld finnast ikki aðra staðni, og tey eru so ómetaliga væl gagnnýtt og beinrakin við sera hepnum lofts- og dronumyndum, har Føroyar rættiliga vísa sína dýrd.

Og so ikki um at tala allar karakterspælararnir, tó at tveir komu uttan úr heimi og bóru leikin væl, so spældu føroysku leikarnir sanniliga upp til sama støði. Søgan væl søgd, tó at hon er nokkso ”klassisk”.

Ein ótrúligur pakki av góðum filmshandverki, sum var væl pakkaður í føroyskt innpakkningspappír av vøkrum fjallarøðum, veganeti, sjó- og alivinnu og hepum romantiskum búsetingum, men eisini við nútíðar kontórlandsløgum.

Sum filmurin, serian ella leikurin endaði, verður lagt upp til, at hesir seks partarnir ikki eru endin av søguni. So kanska vit fáa eitt sindur meir av hesum sera hepna mentanarverki, ið lættliga kann gerast ein skilagóður vinnuvegur, við teimum hegnismonnum og -kvinnum, ið hava staðið handan leiktjøldini.

Man kundi ikki lata vera við at rætta ryggin, tá ið tað millum mongu stuðlarnar í rullirekstinum eisini stóð, at Klaksvíkar kommuna hevði stuðlað hesum vælaverki.

Stjørnur kunnu ikki virðismeta TROM-verkætlanina nóg væl – Nei, her mugu bæði sól og máni takast í brúk. Tað er nógv, sum týður uppá, at TROM longu hevur lagt heimin fyri sínar føtur.