Seinastu árini er Ung í arbeiði konseptið hjá Klaksvíkar kommunu broytt nakað í mun til siðbundnu Ung í arbeiði verkætlanirnar kring landið. Í Klaksvíkar kommunu fáa ung millum 15-16 ára bjóðað størv í arbeiðsplássunum í býnum. Hetta kann vera í framleiðsluvinnuni, handilsvinnuni ella aðrastaðni.

Jógvan Kallsgarð er settur sum nýggjur samskipari av Ung í arbeiði hjá Klaksvíkar kommunu. Hann byrjaði í starvinum fyrst í mai. Sum samskipari setir Jógvan Kallsgarð seg í samband við starvspláss, og hesi siga so hvørjar hóskandi uppgávur tey hava til ung starvsfólk.

Saman avtala samskiparin og starvsplássið, hvussu nógvar tímar talan er um, og hvat tíðarskeiðið er. Starvspláss kunnu sjálvandi eisini venda sær til samskiparan, um tey hava pláss fyri ungum starvsfólki hjá teimum.

Endamálið við Ung í arbeiði leistinum er, at hin ungi fær roynt seg á arbeiðsmarknaðinum. Tey koma í samband við vinnulívið, fáa eina læring og fáa roynt, um tey nú tíma tað, sum tey hildu. Afturat hesum hevur Klaksvíkar kommuna eisini tørv á, at ymsar viðlíkahlds- og fríðkanar verkætlanir verða framdar, og har er aldursbólkurin á ungum, sum kunnu melda til, 15-18 ár.

Ung í arbeiði verkætlanin hjá Klaksvíkar kommunu hevur tvær ymsar skipanir. Onnur er hendan, sum verður í summarfrítíðini, meðan hin er eftir skúlatíð aftaná summarfrítíðina. Tá kunnu ung hava smá størv eftir skúlatíð í handlum og virkjum í Klaksvík. Og Ung í arbeiði virkar sum millumlið millum ung og arbeiðspláss.

Mikukvøldið, 15. juni kemur Ung í arbeiði at hava eitt tiltak á Finastøðini í Klaksvík fyri ung og foreldur, har kunnað verður um skipanina, og møguleikar, rættindi og skyldur sum arbeiðsfólk.

Meir kann lesast um Ung í arbeiði á hesi leinkjuni: