Eitt hátrýstøki hevur lagt seg yvir okkara leiðir, miðjan fer at liggja ímillum Føroyar og Norra størsta partin av vikuni. Vit fara at liggja í einum veikum luftráki, sum kemur til okkara úr Noregi ella Norðsjónum. Ættin fer at liggja ímillum eystan og landsynning eystan alla vikuna.

Hetta fer at geva klárt og gott veður í stórum parti av landinum – serliga vestanfyri. Eystantil fara løtur við mjørka at hótta.  

Veðrið í vikuni – dag fyri dag:

Mánadag: Hann lækkar út eystri niður í landsynning, 3 til 8 m/s. Seinnapartin undir 5 m/s. Skýggjað ella samdrigið við sólglottum. Yvirhøvur turt, tó okkurt ælið sunnanfjørðs.

Hitin fer at liggja um 8 til 12 stig.

Týsdag: Landsynningur, undir 5 m/s. Samdrigið, men løtur við sól og turt.  Hitin fer at liggja um 8 til 12 stig.

Hitin fer at liggja um 10 til 12 stig.

Mikudag: Landsynningur sunnan, undir 5 m/s. Yvirhøvur klárt í veðrinum og løtur við sól, tó samdrigið onkra løtu.

Hitin fer at liggja um 10 til 13 stig.

Hósdag: Landsynningur, 3 til 8 m/s. Løtur við klárum lofti og sól, men eisini samdrigið ella skýggjað onkra løtu.  

Hitin fer at liggja um 11 til 13 stig.

Fríggjadag: Eystan, undir 5 m/s. Yvirhøvur turt og klárt og løtur við sól. Kann vera skýggjað eystanfyri.  

Hitin fer at liggja um 10 til 13 stig.

Leygardag: Eystan, undir 5 m/s. Skýggjað ella samdrigið og turt.

Hitin fer at liggja um 10 til 12 stig.

Sunnudag: Eystan, undir 5 m/s. Samdrigið og turt.

Hitin fer at liggja um 9 til 12 stig.