Nú seinnapartin er vindferðin 10 til 15 m/s av landsynningi, tað er skýggjað og regn. Tíðliga í kvøld fer ættin at støkka vesturum til útsynning, og tað fer at slíta í – tó okkurt ælið – meðan vindurin minkar niður í 3 til 8 m/s.

Í nátt lækkar ættin niður í sunnan, og í morgin ári fer at regna. Tað fer at regna eitt sindur illa fyrrapartin, so eitt sindur minni seinnapartin, og í annaðkvøld regnar illa aftur og restina av vikuskiftinum – t.e leygakvøldið, sunnunátt og allan sunnudagin. Ikki líka illa alla tíðina, kanska onkur løta við ongum avfalli, men ongantíð ordiliga turt.

Fyri at koma aftur til vindin, so er suðurætt leygardagin og sunnudagin. Vindferðin eitt sindur jøvn, 8 til 13 m/s leygarmorgun og -dag, 10 til 15 m/s leygarkvøld.

Sunnunátt og -morgun eru aftur 8 til 13 m/s, sunnudag 13 til 18 m/s, og so minkar aftur sunnukvøldið niður í 8 til 13 m/s.

Hitalagið alt vikuskiftið fer at liggja um 8 til 11 stig.     

Gott vikuskifti.