Tað fyrsta av hesum trimum lágtrýstum liggur beint norðan fyri Føroyar í morgun. Tí fer vindurin at mala úr ymsum ættum í dag.

Mikudagin fer tað næsta eystureftir beint sunnan fyri Føroyar. Eftir tað er høgætt við kaldari veðri, men longur hósdagin er tað næsta komið somikið nær vestaneftir, at ættin fer niðuraftur í eystan ella landsynning.

Veðrið í vikuni – dag fyri dag:

Mánadag: Um náttina 3 til 8 m/s av vestri, sum út á fyrrapartin lækkar niður í útsynning. Seinnapartin makar hann vindin upp í 5 til 10 m/s, og um kvøldið gongur hann upp aftur í vestan. Allan dagin skiftandi skýloft og ælaveður.

Hitin mánadagin 3 til 7 stig.

Týsdag: Vestan, minkandi vindur úr 5 til 10 m/s á um náttin niður í næstan einki á middegi, skiftandi skýloft og ælaveður um náttina, men um morgunin klárnar, og tað slítur í. Seinnapartin fer hann at mala úr ymsum ættum, meðan tað er klárt í veðrinum og turt. Um kvøldið kemur hann av eystri og so landnyrðingi, vindurin veksur upp í 5 til 10 m/s, tað dregur samanum, gerst skýggjað og tað fer at regna.

Hitin týsdagin 3 til 7 stig.

Mikudag: Um náttina landnyrðingur, 5 til 10 m/s, skýggjað og regn. Út á fyrrapartin hækkar hann upp í norðan, enn skýggjað og regn, men út á seinnapartin skiftandi skýloft og ælaveður.

Hitin mikudagin 2 til 5 stig.

Hósdag: Norðan, 3 til 8 m/s, skiftandi skýloft og ælaveður við regni og vátakava. Seinnapartin gongur hann niður í Landnyrðing og fer at veksa vindin upp í  10 til 15 m/s, samdrigið og ælaveður við regni og vátakava.

Hitin hósdagin úr frostmarkinum upp í 5 stig.

Fríggjadag: Landnyrðingur, 10 til 15 m/s, skýggjað og regn ella vátakavaavfall. Um kvøldið norðan, 13 til 18 m/s, skýggjað og vátakavi.

Hitin fríggjadagin úr frostmarkinum upp í 4 stig.