Søgulig mynd um ikki so gomul
Hóast henda myndin ikki er so ógvuliga gomul, og er tikin í 1994 ella væl áðrenn tað, so er hon søgulig, tí hvørki Norðborg, Seglhúsbátarnir, Esther ella Stathav, sum liggur við Norðborg, eru til longur. Helst eru onkrir av hinum bátunum, sum liggja longur inni, eisini farnir í søguna. Stathav fórst við Hoyvíkshólm tann 5. desember 1994, og báðir menninir umborð sjólótust.
Tað eru nógvar og stórar broytingar hendar fram við sjóvarmálanum í Klaksvík í mínari tíð, og eisini á eystaru síðuni á vánni. Teir gomlu bygningarnir á Stongunum vórðu burturbeindir miðskeiðis í 1980 unum, og sjey stórar hallir til heilsølu og timburhandil vórðu settar har í staðin. Tann norðasti bygningurin, sum var tað gamla Hermetikkvirkið, slapp at standa eftir. og er nýliga settur í stand.
Longur heimi á vánni er tað heldur onki, sum líkist sær sjálvum, frá tí fyrsta eg minnist. Økið heimi á sandinum er fylt út, og har standa fleiri nýggir bygningar, og helst koma fleiri afturat. Alt hevur sína tíð.
Hjalmar Waag Høgnesen, sum sigldi sum skipari við Barsskor í ein mansaldur, tók myndina