Útróðrarbáturin Gusti við Kjartan Joensen í Leirvík, liggur í løtuni á Lorvík og bíðar eftir landing. Kjartan Joensen, skipari og eigari sigur, at hann hevur ikki verið í so stórum snellufiskaríið norðanfyri nú í mong mong ár.

Eg havi verið úti í tveir dagar og kom á Lorvík í gjár við 10.500 pundum av stórum toski. Ja, satt at siga, so havi eg næstan bara I og II tosk og summir eru so stórir, at legði eg teir fyri tær saman við føroyabankatoski so haldi eg ikki at tú hevði kent mun. Toskarnir eru stórir og feitir. Nú veit eg ikki nær eg sleppi at landa, men tá eg veit nakað, skal eg siga tær frá, so tú kanst sleppa at taka myndir.

Hetta havi eg ikki sæð í mong harrans ár, segði Kjartan Joensen at enda og leggur afturat, har var eisini ein Sørvágsbátur nøkurlunda á leiðini har eg var og hann metti seg til góð 8.000 pund, eisini av stórum toski tá hann fór at sigla.

Tað sær tí í løtuni út til, at tað er ikki bert friðingin av Føroya Banka, ið hevur havt positiva ávirkan á toskastovnin.

Les grein niðanfyri har framsýnti Osmund Justinussen skrivar um at toskafiskiskapurin verður tiltakandi