Bæði Ruth Vang og Margit Stórá, landsstýriskvinnur í Havn, søgdu í Breddanum 26. apríl, at tað er politiska skipanin, ið skal gera hesar raðfestingarnar. Erling Eidesgaard, sum eisini býr í Havn, var nakað bleytari í formuleringunum, men tók lutvíst undir við teimum báðum. Bert Eyðdis Hartmann Niclasen úr Miðvági dugdi av teimum fýra at síggja tað sum gott og bara gott, at vinnan hevur latið Klaksvíkar Sjúkrahúsi hendan skannaran.

Orsøkin til ónøgdina hjá hinum? Jú, “vinnulívsfólk skulu ikki gera politiskar raðfestingar”. Í somu sending var eisini funnist at, at fólkatingslimir koma við fígging til føroyskar verkætlanir.

Vit hava annars júst sæð vinnulívsfólk í Havn havt “fundraising”, har privatir íleggjarar hava sett pening í eina ítróttarhøll í Hoyvík. Har komu mín sann eisini 30 milliónir, sum føroysku fólkatingslimirnir høvdu fingið til vega úr Danmark. Danska fíggingin hevði sum treyt, at restin av fíggingini eisini kom upp á pláss – og tá gjørdi Løgtingið ikki mætari enn at játta teimum 5 milliónir. Ongin mistonkiliggerð ella skepsissur, hóast bæði vinnulívspengar og statskassapengar vóru uppií – einans vælvild frá politikarunum í Havn. Bara tað liggur hjá teimum, er alt í lagi.

Til samanberingar kostar 3 Tesla-skannarin ikki Landskassanum eina krónu, men fer tvørturímóti at spara tí almenna pening við minni ferðing hjá sjúklingum, minni sjúkrafráveru, og ikki minst sleppa vit undan at rinda danska heilsuverkinum fyri hesar kanningarnar. Eitt risa frambrot.

Er tað veruliga so galið, at politikarar í Havn einans síggja nakað gott í, at vinnulívið gevur føroyska samfelagnum nakað aftur, um tað verður givið teirra býi ella grannabygdunum har?