Ein gjøgnumgangandi atfinning í lemjandi frágreiðingini frá løgtingsgrannskoðarunum um óskilið á Landssjúkrahúsinum í sambandi við útbyggingina er, at alt ov nógv grugg er inni í myndini, ábyrgdin verður plaserað fleiri staðni og harvið onga staðni, og at ov nógvir kokkar hava spilt matin. Hendan myndin er avgjørt ikki vorðin minni gruggað av, at varastjórin á Landssjúkrahúsinum nú er landsstýriskvinna í heilsumálum.

At síggja til hevur ikki sørt av samansósing verið millum og leiðsluna á Landssjúkrahúsinum og tey, ið bygdu ella ráðgóvu, til dømis við at nýggj ynskir um t.d. innbúgv vinna frama, alt er ikki rætt upplýst, nýynski verða gingin á møti og broytingar tí gjørdar mitt í tí heila, uttan politiska viðgerð. Vit skattgjaldarar vórðu hildnir fyri spott – eitt nú skulu vit trúgva, at tað kom púra óvart á øll tey involveraðu, at H-bygningurin skuldi bindast í Landssjúkrahúsið, og tí mátti eykajáttan til, tí tað hevði ongin sæð koma?!? Úrslitið av hesum vavgreytinum er, at skattgjaldarin hevur fingið eina eykarokning uppá 300 milliónir, sum kanska fer at tátta í hálva milliard, tá avtornar.

Tað er beinleiðis tragikomiskt, at meðan alt hetta fer fram, so dittar leiðslan á Landssjúkrahúsinum, eisini varastjórin í farloyvi, sum situr í Landsstýrinum, sær at leggja fótonglar í vegin fyri, at Klaksvíkar Sjúkrahús fær eina gávu, sum ikki fer at kosta skattgjaldaranum eina krónu, men tvørturímóti hevði spart nógvar almennar pengar í uttanlands-sjúkraflutningsútreiðslum, styttum sjúkrafarloyvum og ikki minst skjótari útgreining og smidligari kanningartilgongdum.

Tað hevði klætt teimum, sum so ella so hava verið partur av tí risagøluni, sum H-bygningurin er, at gingið meira stillisliga um hurðarnar komandi mánaðirnar og sjálvrannsakað, heldur enn at tvíhalda um sín rætt at niðurleggja Veto fyri, at vælrikna vinnulívið í norðurøkinum gevur vælrikna Klaksvíkar Sjúkrahúsi eina sømdargávu. 

Fyri at gera komediuna fullkomna, so er Norðlýsinum fortalt, at stjórin á Klaksvíkar Sjúkrahúsi, Alexandra á Dul, als ikki sleppur at vera við í viðgerðartilgongdini av, um takast skal ímóti skannaranum. Hon skal av onkrari orsøk vera sett í karantenu. So tað vera tey gøluraktu, sum saman við stjóranum á Suðuroyar Sjúkrahúsi gera av, um Klaksvíkar Sjúkrahús kann taka ímóti gávuni.

Og disse regeres vi af.