Lýsing
Lýsing
Lýsing
Onkuntíð arbeiðir tað almenna skjótt. Tað gingu bert seks dagar - fýra verkadagar - frá tí, at forstjórin bað um at fáa setanarskeið sítt longt til tað var avgreitt av Turid Arge, aðalstjóra. | Mynd: Norðlýsið hevur sett saman.

Stjórasetan avgreidd upp á fýra verkadagar

SKRIVAÐ: Jóhann Lützen  |  01.06.2023 - 14:10 Tíðindi

Tað tók aðalstjóranum í Heilsumálaráðnum bert fýra verkadagar í november í fjør at leingja setanarskeiðið hjá forstjóranum í Sjúkrahúsverkinum við trimum árum. Dagin eftir bleiv løgtingsval útskrivað.

Forstjórin í Sjúkrahúsverkinum hevði bert sitið í gott 3 av 5 árum av setanarskeiðnum, tá Steinar Eirikstoft mikudagin tann 2. november 2022 søkti Heilsumálaráðið um at leingja sína stjórasetan við trimum árum. Í umsóknini grundgevur Steinar fyri ynskinum við at vísa á, at ein vansi við, “at fólk byrja at síggja ein enda á mínari setanartíð, er, at eg missi mín leiðsluliga og organisatoriska autoritet, tí starvsfólk vita, at onkur annar kemur at taka við um ikki so langa tíð”.

Umsóknin frá Steinari Eirikstofti um at leingja stjórasetanina við trimum árum.

Formliga letur sáttmálin hjá forstjóranum í Sjúkrahúsverkinum upp fyri møguleikanum, at setanarskeiðið kann longjast við trimum árum, um báðir partar ynskja tað. Hetta er vanligt í samband við tíðaravmarkaðar stjórasetanir í tí almenna.

Meira imponerandi er tað tó, at tað tók Turid Arge, aðalstjóra í Heilsumálaráðnum, bert fýra verkadagar at viðgera og avgreiða umbønina frá forstjóranum. Hann fekk játtandi svar longu fyrrapartin týsdagin tann 8. november 2022. Havast skal í huga, at talan er um eitt tað best lønta stjórastarvi í almenna geiranum við eini mánaðarløn á umleið 90.000 krónur um mánaðin íroknað pensjón.

Stutta játtandi svarið frá Heilsumálaráðnum upp á umsóknina um at leingja setanarskeiðið við trimum árum.

Í Sjúkrahúsverkinum starvast yvir 1000 starvsfólk innan nógvar ymiskar fakbólkar. Norðlýsið hevur biðið um alment innlit í allar fundarfrásøgnir, telefonnotatir ella líknandi í sambandi við viðgerðina av longjanina av stjórasáttmálanum. Her var onki tilfar at geva innlit í. Sostatt hevur aðalstjórin í Heilsumálaráðnum avgreitt longjanina av stjórasetanini upp á nakrar fáar dagar uttan yvirhøvur at spyrja seg fyri í starvsfólkahópinum í Sjúkrahúsverkinum.

Tann 9. november 2022 skrivaði løgmaður út val at vera til løgtingið tann 8. desember 2022. Eftir at løgtingsval er útskrivað, kann heilsumálaráðharrin ikki taka týðandi politiskar ella fyrisitingarligar avgerðir. Sostatt var tað eisini í tøkum tíma, at Turid Arge avgreiddi leingjanina, um tað ikki skuldi ganga eini tveir mánaðir aftrat.

Trivnaðarkanning: Leiðslan er ov lítið sjónlig

Um Heilsumálaráðið hevði havt spurt seg fyri hjá starvsfólkunum í sjúkrahúsverkinum, høvdu tey helst fingið okkurt at hugsað um. Tí hósdagin tann 3. november 2022 sendi leiðslan í Sjúkrahúsverkinum eina skrivliga kunning til starvsfólkini um úrslitini av eini umfatandi trivnaðarkanning, ið var gjørd á sumri 2022.

Her er eitt brot úr kunningini frá leiðsluni í Sjúkrahúsverkinum sent starvsfólkunum tann 3. november 2022:

Sjúkrahúsleiðslan fær atfinningar

Í trivnaðarkanningini høvdu starvsfólk møguleika at siga sína hugsan um sjúkrahúsleiðslurnar, og samanumtikið kunnu vit staðfesta, at her eru viðurskiftir, ið vit mugu arbeiða miðvíst við og betra um.

Millum annað gevur kanningin ábendingar um, at vit á summum virkisøkjum eru ov lítið sjónlig og ikki duga nóg væl at greiða frá strategiini og teimum avgerðum, sum verða tiknar.

Lýsing
Seinastu tíðindini
Team Klaksvík fær vitjan av KÍF
Vit elska Klaksvík og KÍ
Stjørnan og EB sunnudagin kl. 13.30
Verður tað í morgin, at KÍ endur­vinnur F…
Nýggjur Gadus birtir vón
Frits væl fagnaður í Gallarí Havnará
ES-innflutn­ingur av russiskum flótandi n…
Umboð fyri Nes kommunu vitjaðu dagstovna…
Nýggjar kloakkir á Eiðinum
Russland og Ukraina samstarva um, at hal…
Bretar handla við Russland i milliardakl…
Hvar blivu lyftini um lættar og yvirskot…
Samstarvið við ES eigur at styrkjast
Fíggjar­lógin avspeglar máttloys hjá samg…
- Hetta veit vist nokk líka nógv um búsk…
Nordea-grunnurin vil stuðla við 100 mió.…
Býráðsminnilutin givið Anniku nevndarses…
Heimskendu Orphei Drängar vitja Varpið
Fíggjar­lógin 64 milliónir í halli
Leitar eftir upplýsingum um flatmaðk