Hátíðarløta fór fram á ísraelsku sendistovuni í Keypmannahavn.

Sendiharrin ynskti Svenning av Lofti til lukku við tilnevningini, við ynskjum um framhaldandi gott samstarv millum londini bæði.

Svenning hevur halgað ein part av tíð síni at menna sambandið millum Føroyar og Ísrael. Í meiri enn 45 ár hevur hann tosað og kunnað Ísrael.

Svenning hevur skipað fyri ferðum og verið ferðaleiðari hjá føroyingum á ísraelsferðum síðani 1977 og hevur ferðast hagar umleið fimti ferðir.

Svenning var við til at stovna Vinafelagið Føroyar Ísrael, har hann í fleiri ár var nevndarlimur og formaður.

Í mai 2007 varð Svenning heiðraður av ísraelska Ferðamálaráðnum, fyri tá at hava ferðast við føroyingum til Ísraels í 30 ár.

Dagurin í dag er ikki bara søguligur fyri Føroyar, men eisini søguligur fyri ísraelsku sendistovuna.

Hetta er fyrstu ferð, at ísraelska sendistovan útnevnir ein heiðurskonsul. Hetta staðfestir góða vinalagið og samstarvið millum Ísrael og Føroyar.