Sera nógv fólk vóru møtt í bygdarhúsinum á Húsum mikukvøldið 30. august, tá strandferðslustjórin, Niels Juul Arge við fylgi, var komin norður at greiða kalsoyingum frá nýggju bíleggingarskipanini, sum longu er galdandi nú Erla Kongsdóttir “røkir” kalsoyarleiðina í tíðarskeiðnum Sam er á beding, og sum ætlanin er seta í verk, tá Sam fer aftur í sigling.

Ynsktu at greiða frá og at hoyra, hvørji ynskir kalsingar høvdu.

Endamálið við fundinum var sambært SSL at greiða frá bíleggingarskipanini, at hoyra meiningina hjá kalsoyingum um skipanina og at fáa uppskot um møguligar tillagingar í bíleggingarskipanini í mun til tað, sum SSL legði fram.

Kalsoyingar stúra fyri verri tænastu við bíleggingarskipan.

Tað er ikki at taka munnin ov fullan, tá sagt verður, at kalsoyingar stúra fyri einari verri tænastu við nýggju bíleggingarskipanini. Serliga um hon ikki verður tillagað eftir ynskinum hjá kalsoyingum.

Stórsta orsøkin til stúranina er, at oyggjabúgvar, sum er hava tryggja fimm pláss til bilar allar túrar við Sam. Tað ger at oyggjafólk so at siga altíð sleppa við bili í og av oynni. Fólk í oynni eru sera fegin skipanina, sum er ein fyritreyt fyri búlíkindum, tí so at siga øll ørindi mugu gerast í Klaksvík ella aðrastaðni í landinum. Hetta kemst av, at eitt nú eingin handil, bensinstøð, læknaviðtala, ella tannlækni eru í oynni.

Kalsingar vóru á tí einum máli um, at talan var um risa afturstig fyri tænastustøðið, um skipanin við tryggjaðu plássunum ikki slapp at halda fram.

Annað sjónarmið var harumframt, at tøk pláss átti at vera til oyggjabúgvar, fyrst og fremst, men eisini aðrar føroyingar við tilknýtið til oynna, ið ikki ferðast í bili.

Orsøkin til ynski er, at ferðafólkatalið í Kalsoynna er sera nógv vaksið hesi seinastu árini, og at vandin fyri at standa eftir á bryggjuni, tá ferjan loysir bara økist, so hvørt ferðafólkastreymurin veksur.

Lovaðu at lurta eftir ynskinum frá kalsoyingum.

Tá tikið varð samanum lívliga og fjøllmenta fundin, lovaðu umboðini fyri SSL, at tey fóru at taka ynskini hjá kalsoyingum við í skjáttina um Kalsoyarfjørð og suður aftur til Suðuroyar, har tey óiva fara at arbeiða víðari við bíleggingarskipanini, hóast lunkaðu undirtøkuna frá kalsoyingum.

Ynskið var í minsta lagi at tillaga skipanina soleiðis, at kalsoyingar ikki fáa eina verri tænastu, um hon verður sett í verk umborð á Sam eisini.

Oyggjafólk vóru samd um, at einhvør broyting á kalsoyarleiðini átti at betra um tænastuna og ikki øvugt.

Dennis Holm, landsstýrismaður vitjar Kalsoynna

Umframt drúgvu viðgerðina av bíleggingarskipanini, kom eisini fram á fundinum, at Dennis Holm, landsstýrismaður í samferðslumálum vitjar Kalsoynna í komandi viku, hósdagin 7. september. Tá verður aftur skipað fyri fundi um samferðsluviðurskiftini, har landsstýrismaðurin fer at leggja sínar ætlanir fram, og at hoyra oyggjafólk.