Amanda Niclasen er liðskipari hjá kvinnunum hjá Mjølni, og hon sigur, at tær eru væl fyri og púra klárar til stóra brakið ímóti Drátti leygardagin. – “Vit hava vant hart líka síðani á jólum, og vit kenna okkum klárar. Tíverri hava vit mist ein spælara á miðjuni, ið er skødd, og tað merkist, men vit hava eisini gott fólk at seta inn”, sigur Amanda, – “Vit hava fleiri ungar leikarar, sum eru klárar at taka ábyrgd, so vit eru ótrúliga spentar”.   

Spurd um hvussu tær síggja Drátt, svarar liðskiparin: – “Dráttur liggur sum nummar eitt, og tær hava vunnið allar sínar dystir inntil nú í seinastu viku, tá tær taptu 2-3 ímóti Fleyr. Tær hava eitt ótrúliga gott lið við royndum leikarum, og tær hava ein serliga góðan útlendskan leikara, ið vinnur nógvar bóltar, so tað verður heilt spennandi. Vit eru í øllum førum ordiliga uppsettar og spentar uppá at spæla”.

– “Vit vóna at síggja ordiliga nógvar áskoðarar, sum fara at larma, rópa og vera við uppá tað”, sigur Amanda at enda.

Hálvfinalan millum kvinnurnar hjá Mjølni og Drátti verður leygardagin kl. 13:00 í Badmintonhøllini í Klaksvík.