Av teimum 97 fylgiskjølunum eru 95 hoyringarsvar. 20 av hoyringarsvarunum koma frá kommunum, 4 ferðaskrivstovur (Visit-) hava ummælt, tríggjar teirra við felags skrivi, hagapartar og hagastýri úr ymiskum økjum standa fyri 9 hoyringarsvarum, 5 frá aðalráðum, 10 frá felagsskapum, og so kemur restin frá fyritøkum og privatpersónum. Lógaruppskotið má tí sigast at hava rakt sera breitt í føroyska samfelagnum.

Tað hava teir mongu fundirnir um evnið seinastu tíðina eisini undirstrikað, eins og kjaksendingar, blaðgreinar, lesarabrøv og ikki minst nógva skrivingin á internetinum. Nú er tíðin so komin til, at Føroya Løgting skal skera ígjøgnum.

Serliga bøndurnir hava verið lítið álvuligir við uppskotið, men eisini ferðavinnan rópar varskó. Eitt nú sigur Ferðavinnufelagið, at avgjaldið upp á 150 kr. fer at gera føroyska avgjaldið til tað hægsta í Europa og tað fer at styggja ferðafólk burtur, sigur Ferðavinnufelagið í sínum hoyringarsvari. Her kann leggjast afturat, at síðani tá er gjaldið sett enn longur upp.

Tingfundurin týsdagin 19. mars byrjar klokkan 10, og málið um burðardygga ferðavinnu er nummar 6 á dagsskránni.