Í dag tekur KÍ felagsvenjingina uppaftur
KÍ-leikararnir hava havt frí frá felagsvenjingum síðani B36-dystin.
Tá landsliðssteðgur er, so taka liðini ofta frí í nakrar dagar. Eisini er vanligt, at útlendskir venjarar og leikarar fara at vita heimlandið í nakrar dagar. Vit sóu m.a. í 2-2 venjingardystinum millum NSÍ-B36 fríggjakvøldið, at liðini høvdu bara ein útlending við í part.
Tá KÍ er FM-vinnari, so liggur longu greitt, at í summar skal liðið spæla í minsta lagið fýra altjóða dystir og tað merkir, at liðið fær onga summarfrí. Tí er tað hesin landsliðssteðgurin og landsliðssteðgurin fyrst í juni sum er til at taka, um venjarar og leikarar skulu hava frí í nakrar fylgjandi dagar. Í hesum umfarinum hevur KÍ-hópurin havt frí frá felagsvenjingum í eina viku. Venjingin byrjar aftur í dag. Komandi dystur er í Klaksvík 2. páskadag kl. 15.00 móti NSÍ.
KÍ-venjarin segði soleiðis við Norðlýsið eftir B36-dystin:
Landsliðssteðgur
Nú er landsliðssteðgur og tað ger, at KÍ-venjarin gevur sínum leikarum frí í nakrar dagar. M.a. fyri a fáa mentalt yvirskot til eitt langt kappingarár.
- Nakrir fara við landsliðum. Hinir taka frí í nakrar dagar, tí vit mugu hava mental yvirskot til eitt langt kappingarár. Síðani fáa leikararnir programmir at venja eftir, og so hava vit nakrar av teimum yngru, sum koma at venja við 1.deild, sigur Haakon Lunov.