Boston Fury, sum hann tá nevndist, var smíðaður í 1950 í Aberdeen, var 799 tons brutto og hevði 975 hesta guvumaskinu.

Við Hans Paula Johannesen sum skipara varð farið til Grønlands 30. apríl 1955. Teir landaðu tvær ferðir í Føroyingahavnini og komu síðani fullfermdir heim til Føroya 15. juli. Samanlagda saltfiskaveiðan fyri túrin var ikki minni enn 1142 tons – ein sera góð byrjan.

Hans Pauli, sum áður hevði ført trolararnar Norðbúgvan og Jóannes Patursson við góðum úrsliti, førdi Fiskanes til 1959, tá ið hann tók við stjórastarvi í landi. Bróðirin Napoleon (Poli) førdi síðan bátin til 1965, tá ið hann varð seldur av landinum. Yngsti bróðirin Svenning loysti onkuntíð Pola av á brúnni.