Eftir at Norðlýsið bar tíðindini um, at ein sjúklingur hevði vent sær til okkum at vísa sína ónøgd við avgerðina, at hann skuldi til Danmarkar at skannast, so hava vit fingið hópin av reaktiónum, eisini frá starvsfólkum innan sjúkrahúsverk Føroya. Felags fyri reaktiónirnar eru, at fólk ikki vilja nevnast, tí tey óttast at tað kann fáa fylgir fyri teirra starv. 

Norðlýsið hevur fingið at vita frá keldum innan sjúkrahúsverk Føroya, at 28 sjúklingar skulu til Danmarkar at skannast fyri prostata, hóast at teir væl kundu verið skannaðir á Klaksvíkar Sjúkrahúsi.

Umframt spill av tíð hjá sjúklingum og avvarandi, so er tað eisini spill av skattgjaldarans pengum. Útreiðslan fyri hvønn sjúklingin er umleið 50.000 krónur fyri hvønn so talan er um eina útreiðslu á umleið 1.400.000 krónur. 

Tað verður mett at skanningarnar av teimum 28 sjúklingunum høvdu tikið eina viku at framt á Klaksvíkar Sjúkrahúsi.