Talan var um kórini, Morgunkórið v/Sigrið Sivertsen og Kórið í Christianskirkjuni v/Jóhonnu og Ólavur F. Johannessen, sum sungu hvør sær og í felag.

Á skránni vóru, umframt jólaligar kórsangir, eisini felagssangir so áhoyrarnir sluppu uppí part at royna seg. Her spældi Kristoffur Olsen undir á tí nýggja Steinway flyglinum.

Tað var sera hugnaligt at sita í hesi prýðiligu høllini, sum var skrýdd til høvið við jólatrøum og stórum reyðum stjørnum, umframt at ljóssetingin hóskaði sera væl til.

Tá ið ljóðgóðskan afturat er so góð, sum hon er - júst til kórsang, var lætt at droyma seg til Wien og aðrastaðir, har líknandi hallir eru at finna.

Ein frálíka góð og hugnalig konsert, har tað aftaná var møguleiki at keypa heimabakaðar køkur og kaffi aftur við einum góðum práti.