Høvuðsarbeiðstøka at umvæla starvsfólkabygningin boðin út
Starvsfólkabygningurin var bygdur í 1962 og hevur verið nýttur til fleiri endamál. Eitt nú sum sjúklingahotell, bústaður hjá læknum, umsiting av Klaksvíkar sjúkrahúsi og verkstað hjá umsjónarmonnunum.
Nú verður farið undir at dagføra og umvæla karmarnar, so bygningurin framhaldandi kann vera ein góður bústaður fyri læknum og vakthavandi á Klaksvíkar Sjúkrahúsi. Ein hædd verður sett av at húsa borgarum, ið eru til viðgerð og endurvenjing vegna sjúkur sum t.d. sklerosu.
Bygningurin verður klæddur og bjálvaður uttan og alt innan verður skift, umframt allar tøkniligu innleggingar verða gjørdar av nýggjum.
Bygningurin er í fýra hæddum, har hvør gólvvídd er 365 m². Samlaða gólvvíddin er 1.460 m².
Freist at lata tilboð inn er mánadagin 20. januar 2025, klokkan 14:00