Rockwool, Novo Nordisk, Ecco og Pindstrup eru millum størstu donsku fyritøkurnar í Russlandi. Rockwool umsetti fyri meira enn 1,5 milliard í 2023, og hevði eitt úrslit eftir skatt áljóðandi 270 milliónir. Hetta stendur at lesa í teirra roknskapum fyri 2023. Onkrar av hesum fyritøkunum siga gamaní, at tær fegnar vilja úr Russlandi, men tær hava eftir øllum at døma ongan skund.

Og av tí at donsku fyrirtøkurnar handla í Russlandi sjálvum, so gjalda tær skatt til russiska statin.

Meira kann lesast um hetta á https://www.berlingske.dk/business/business-overblik-danske-virksomheder-saelger-fortsat-for-milliarder-i (krevur hald).

Eisini vita vit, at ES-lond framvegis keypa í milliónavís av kubikkum av gassi úr Russlandi, ikki minst ígjøgnum rørleiðingar, sum ganga ígjøgnum Ukraina.

Hóast Danmark ikki hevur kravt av donskum fyritøkum, at tær trekkja seg úr Russlandi, og hóast Danmark ikki hevur lagt trýst á sínir samveldisfelagar í ES um at gevast við at keypa gass úr Russlandi, so hava danskir politikarar púra ósmæðið staðið og sagt, at teir eru ”fuldstændig ligeglad med de fiskeriaftaler” um føroysku fiskiveiðiavtaluna við Russland.

Við øðrum orðum hava danskir fólkatingslimir onki ímóti, at danskar fyritøkur handla fyri milliardir í Russlandi, og teir hava onki ímóti, at ES (har Danmark er limur) keypir fleiri milliónir m³ av gassi úr Russlandi. Men tað er teimum ein tornur í eygað, at lítlu Føroyar hava eina fiskiveiðiavtalu, sum enntá er um mat, ið ST greitt hevur sagt skal undantakast sanktiónum.

Men í øllum førum hava Føroyar nú fingið krút til at skjóta aftur við, um nú danskir politikarar aftur byrja at ilskast inn á okkara fiskiveiðiavtalu. Sjálvir kunnu teir gera nógv størri mun við at sópa fyri egnum durum fyrst.