Vilma Larsson, ið er 25-ára gomul, hevur áður arbeitt í matvøruhandli, á røktarheimi og á verksmiðju. Fyri einum ári síðani segði hon seg úr starvi og fór heim at vera unnusta hjá manni sínum fulla tíð. Og sjálv sigur hon seg aldrin hava havt tað betri.

– ”Lívið hjá mær er vorðið bleytari. Eg stríðist ikki. Eg eri ikki serliga strongd. Hvønn mánað gevur unnusti mín mær eina upphædd, og um mær tørvar meira, so spyrji eg hann bara. Ella eg seti til síðis, um mær tørvar minni onkran mánað”, sigur Vilma.

Rákið rópast á svenskum hemmaflickvän, heimaunnusta, og hemmafru, heimakona, alt eftir um kvinnan er gift ella unnusta hjá manni sínum. Á enskum verður tað rópt ”soft girl”, sum beinleiðis umsett merkir bleyt genta. At tað eitur genta heldur enn kvinna kemst m.a. av, at Ungdomsbarometern hevur kunngjørt eina kanning, har 14% av teimum 14-ára gomlu gentunum siga sín samleika vera soft girl.

Rákið kann sjálvsagt ikki sigast at vera nýtt, tí mong fólk í dag minnast framvegis, tá heilt nógvar kvinnur vóru heimagangandi heldur enn á arbeiðsmarknaðinum, ikki minst her í Føroyum. Og eftir Svøríki at døma, eru tað nú aftur gentur og kvinnur, sum fegnar vilja vera heimagangandi og í antin parlagi ella hjúnabandi við ein mann, ið so stendur fyri at vinna peningin til nærsambandið.

Meira um rákið kann lesast á https://www.bbc.com/news/articles/c0j1wwypygxo