Aki-Mathilde Høegh Dam førdi fram, at amerikanski áhugin fyri Grønlandi heilt greitt prógvar, at Grønland er sera týdningarmikið geopolitiskt. Men hon legði eina við, at hennara ynski er, at grønlendska fólkið sjálvt fær ”højhedsret” yvir egnum øki. Hon sær hetta sum eitt heilt natúrligt ynski, og harvið er hon ikki fyri at leggja Grønland undir nakað annað vald, men at amerikanska ynski undirstrikar, hvussu virðismikið Grønland er. 

Rasmus Jarlov segði hinvegin, at tað var torført at taka Donald Trump í álvara. At Donald Trump skrivar mong ør ting fyri tíðina, eitt nú vil hann eisini yvirtaka Canada. Jarlov vísir eisini á, at góði vinur Trump, Elon Musk, somuleiðis skrivar ør ting um, at hann vil seta bretska fólkið í frælsi og at yvirtaka Panama-kanalina. Tað er torført at fyrihalda seg til, hóast Donald Trump verður ein sera valdsmikil persónur í næstum, sigur Jarlov.

Men ynskið um at USA fær vald yvir Grønlandi, er sera gamalt. Tað varð framsett fyrstu ferð í 1917, síðani í 1946 og so aftur í 2019. Í 1917 fekk USA Vestindisku Oyggjarnar frá Danmark við treyt um, at USA frásegði sær sítt krav upp á Grønland. Eftir seinna heimsbardaga fingu amerikanarar tó loyvi til at seta ein basa upp í Thule. Og í 2019 bjóðaði Donald Trump seg so til at keypa Grønland frá Danmark, men fekk krakk.

Alt kjakið kann síggjast á https://www.dr.dk/drtv/se/deadline_-magtforskydning-i-rigsfaellesskabet_498859