Donald Trump kastaði ríkisfelagsskapin í eldin herfyri, tá hann á tíðindafundi ikki vildi avvísa at brúka hernaðarliga megi at leggja Grønland undir seg. Hetta hevur fingið alla politisku skipanina í Danmark, Grønlandi og Føroyum upp úr stólinum, men ein sum ikki hevur verið at hoyrt er Sirið Stenberg, forkvinna í Tjóðveldi. 

Norðlýsið hevur fingið fatur á Sirið Stenberg, sum er í Danmark í hesum døgum. Hon svarar skjótt tá vit spyrja hana um hvussu ríkisfelagsskapurin millum Føroyar, Grønland og Danmark hevur tað í kjalarvørrinum á úttalilsunum hjá Donald Trump. 

Vit í Tjóðveldi hava altíð ynskt fult sjálvræði - tað vita øll. Støðan í heiminum í dag prógvar at tað ongantíð hevur verið týdningarmiklari enn júst nú at hava fult sjálvræði.

Og sjálvræði skal byggjast á fólkaræði, vit skulu hava fólkið við okkum og tí mugu vit í Føroyum hava so breiða politiska semju sum yvirhøvur gjørligt. Eg mæli til at vit taka tað róligt, ikki forskrekkja nakran men arbeiða miðvíst at fáa størri sjálvræði, sigur Sirið Stenberg forkvinna í Tjóðveldi. 

Eg havi góðar vónir at politiska skipanin í Føroyum finnur eina samráðingarleið við donsku stjórnina. Vit síggja at báðir samríkjaflokkarnir hava flutt seg á sjálvstýrisleið. Vit hava longu lækka blokkin og framt yvirtøkur í hesum valskeiðnum, sigur Sirið Stenberg við Norðlýsið.