Í hesi tilgongd hevur Jarðfeingi víst stóran áhuga fyri økinum á Fossum í mun til gransking. Tey høvdu møguleika at søkja um stuðul, tí á fíggjarlógini 2022 var serstøk játtan til gransking av hesum slag (Orkustuðulsjáttan). Jarðfeingi fekk játtað stuðul til at gera royndarboring við jarðhitaholum við atliti til kortlegging av jarðfrøðini í økinum, serliga hvat viðvíkur vatnførandi rivum og løgum í undirgrundini og við tí endamáli at útvega nýggja vitan um orkumøguleikar úr undirgrundini

Jarðfeingi stóð fyri verkætlanini, sum varð kostnaðarmett til 331.200 kr. Jarðfeingi søkti um 165.600 kr. (helvtina av kostnaðinum) frá Orkustuðulsjáttanini, og hin helvtarpartin av verkætlanini fíggjaðu Jarðfeingi og Klaksvíkar kommuna við 82.800 kr. hvør. Felagið BORA stóð fyri boringini.

Stutt samanumtøka av úrslitum frá royndarboringini (Brot út Orkuloysn á Fossum s. 13)

• Grundvatnsspegilin í royndarboringini á Fossum situr óvanliga djúpt niðri í boringini – 83,75 m undir yvirflatuni, á leið 30 m omanfyri sjóvarmálan.
• Yvirflatuvatn rennur niður ígjøgnum holið, heilt niður á 375,25 m dýpi, har tað rennur út. Holið er tí ikki egnað til at máta hitan á grótinum fyrr enn eftir 375,25 m dýpi, tá vatnstreymurin steðgar.
• Jarðhitavøksturin er lágur, umleið 0,25 ℃/100 m.
• Hóast tað ikki kann sigast við vissu, so kann væntast, at grundvatnsspegilin í jarðhitaboringum í býlinginum á Fossum fer at vera sera lágur. Tað veldst um, um ein boring rakar rivur ella op við rennandi vatni, og hvussu langt niðri í boringini hetta er.

Lesast kann meira um granskingarverkætlanina her:

Tíðindagrein: Nýggj vitan um grundvatn og týdningurin av hesum fyri jarðhitanýtslu | Jarðfeingi og Grundvatn & jarðhiti | Jarðfeingi

Granskingarverkætlanin: Microsoft Word - Kanningar av orkumøguleikum úr undirgrundini á Fossum - Endalig frágreiðing.docx