Rockpionérur fyllir 70
Í dag fyllir Jørgin Dahl sjeyti. Jørgin er av Vágsheygnum í Klaksvík og er mest kendur fyri sín tónleik. Tað byrjaði við eini kassaguitar og heimagjørdum ljóðførum, og spældi Jørgen í fleiri ymiskum bólkum, áðrenn hann fekk sítt gjøgnumbrot í Arctic Fox saman við m.a. Rudolf Joensen. Men tað var í Straight Ahead, at hann veruliga gjørdist ein rockstjørna.
Straight Ahead varð mannaður av Archibald Black, Hera Ellingsgaard, Edward Ziska og Jørgini sjálvum, og teir eru allir á lívi í dag og vóru við til at fagna Jørgini í fagnaðarkonsertini í Varpinum í mai í fjør. Hetta var eitt 50-ára hátíðarhald fyri fyrstu singleplátuni hjá Straight Ahead, ið kom út í 1974 og hevði “Komið øll við” á. Í 1978 kom so legendariska Veðraplátan, sum sementeraði statusin hjá Straight Ahead í toppinum av føroyskum rocki.
Jørgin Dahl varð í fjør uppiborið heiðraður við Listavirðisløn Nólsoyar Pálls fyri síni tónlistarligu avrik.
Jørgen Dahl er eisini kendur úr Hjarnum og við lagnum Breaking My Heart, áðrenn hann fór til Danmarkar at búgva, og har hevur hann búð síðani. Jørgin er framvegis virkin tónleikari og gav so seint sum í fjør út tveir sangir, rocksangin ”Watch me – I’m Free” og tann stillara ”Song for Her”. Hetta gjørdi hann saman við so mætum monnum sum Óla Poulsen, Graham Stewart og Per Zachariassen, sum gjørdi videolagið til fyrrnevnda sangin.