Norðlýsið fyllir 110 ár í morgin
Øll eru vælkomin á gátt til eitt gott prát og heilsa uppá, vit hava kaffi og okkurt søtt afturvið. Vit senda beinleiðis útvarp frá kl. 10 til 17 í morgin
Fríggjadagin tann 16. apríl 1915 kom Norðlýsið út fyri fyrstu ferð, hettar var lokalblað hjá norðoyingum, og samstundis fyrsta føroyska lokalblaðið.
Í fyrsta leiðarinum skrivar Símun Petur Zachariassen millum annað soleiðis um endamálið við blaðnum:
Tað hevur leingi veirð ein saknur at vit uttanfyri Havnina hava eitt blað, ið kann røkja okkara serligu bygdaáhugamál. Tað er ikki meiningin at blaðið skal vera partapolitiskt, men hýsa øllum áhugamálum.
Nú 110 ár seinni, er støðan júst tann sama í so máta. Tó hevur tøknin ment seg soleiðis, at vit í dag umframt blaðið hava vælvitjaðu heimasíðu okkara. Harnæst eru vit farin undir at senda beinleiðis útvarp, sum hoyrist kring allan heim.
Stjórar á Norðlýsinum hava verið
- Símun Petur Zachariassen 1915 - 1935
- Hákun Djurhuus 1936 - 1945
- J. Simun Hansen 1951 - 1966
- Óli Dahl 1966 - 1974
- Eigil Hentze 1974 - 1976
- Oliver Joensen 1976 - 2017
- Jóhann Lützen 2017 -