Broytingin í sjófeingislógini fór ígjøgnum við 13 atkvøðum fyri og 12 ímóti, og tað merkisverda var, at Bjarni Hammer úr Javnaðarflokkinum atkvøddi ímóti uppskotinum hjá samgongufelagnum Tjóðveldi.

Í gjár atkvøddi Liljan Weihe úr Tjóðveldi ímóti uppskotinum um Suðuroyartunlinum hjá samgongufelagnum løgmanni.

Og í fjør atkvøddu Hanna Jensen og Sólvit Nolsøe í Framsókn ímóti uppskotinum hjá egna flokki sínum um fosturtøku.

Tað gerst tí meira og meira greitt, at tingfólk kenna seg frítt stillað um, hvussu tey atkvøða, og tað kann lættliga koma at bíta samgonguna í halan, tá tey bæði stórmálini pensiónsaldurin og Suðuroyartunnilin koma fyri til 3. viðgerð tann 19. mai. Breið undirtøka var gamaní fyri Suðuroyartunlinum, meðan einans samgongutingfólk taka undir við at hækka pensiónsaldurin.

Hægri pensjónsaldur varð samtyktur við 16 atkvøðum móti 13, og tað merkir alt annað líka, at bara 2 samgongutingfólk skulu fáa kaldir føtur, so fellur málið.

Í gjár var altjóða arbeiðaradagur, og tá fingu bæði Javnaðarflokkurin og Tjóðveldi av grovfílini frá arbeiðarafeløgunum fyri at hava svikið arbeiðarastættina við at hækka pensjónsaldurin. Í dag útsetti tingforkvinnan 3. viðgerð av málinum, tí ”tað var komið eitt ynski” um tað. Tað kundi bent á, at ikki øll tey 16 samgongutingfólkini eru eins álvulig við at hækka pensjónsaldurin.

Tað er í øllum førum greitt, at tingfólk eru farin at ganga egnar leiðir, og at allir tríggir samgonguflokkarnir hava leiðslutrupulleikar og fólk, sum ikki ganga í takt. Fær tað onga avleiðing fyri Liljan Weihe ella Bjarna Hammer, at tey atkvøddu eftir egnari sannføring og ikki eftir flokslinjuni, ja, so er tað eitt signal til hini samgongutingfólkini um, at tey kunnu gera tað sama.

Og tá er upploysnin ikki spakulig longur.