Millum tey bæði lágtrýstini er ein hátrýstryggur – hann fara vit at merkja seint hóskvøldið og eitt sindur út á fríggjanáttina.

Hósdagin:

Á middegi kemur hann sunnaneftir, frískur vindur upp í hvassan vind, 10 til 15 m/s, samdrigið og samregn. Út á seinnapartin gongur hann vesturum og minkar vindin spakuliga. Um kvøldið eru frískt lot til frískan vind vestan, 5 til 10 m/s, skýggjað og ælaveður. Fríggjanáttina gongur hann niður í útsynning. Hitin 10 til 13 stig.

Fríggjadagin:

Fyrrapartin frískur vindur upp í hvassan vind sunnan, 10 til 15 m/s, samdrigið og regn. Seinnapartin og um kvøldið fer hann at koma av útsynningi, eitt sindur minni vindur, 8 til 13 m/s, samdrigið og regn ella ælaveður. Út á náttina minkar vindurin niður um 10 m/s. Hitin 9 til 13 stig.

Leygardagin:

Hann fer at liggja millum vestan og útsynning allan dagin, frískt lot til frískan vind, 5 til 10 m/s, fyrrapartin og eitt sindur út á seinnapartin við skiftandi skýlofti og sólglottum, men eisini okkurt ælið. Sum tað líður á seinnapartin minkar vindurin niður í lot til frískt lot, 3 til 8 m/s, og tað er so vindferðin restina av degnum og kvøldinum. Lofti skýggjað og yvirhøvur turt. Hitin 10 til 14 stig.