Í fjør bygdi hann ein rættiligan bygning til endamálið og keypti fleiri størri frituru-kør at kóka / steikja í. Áðrenn hevði hann ein skúr, tey húsaðust í, sum bleiv tikin niðuraftur eftir Sjómannadagin.

Aftur í ár hevur hann enn einferð bygt út. Hann hevur fingið til vega frá einum niðurløgdum virki í Íslandi fleiri flakalinjur til virkið á Kósini. Men við í keypinum fekk hann eitt størri frituru-borð við fimm frituru-kørum og einum hitapotti.

Um tað ikki var nóg mikið, so hevur hann gjørt eina størri ella næstan yvirvaksna ventilatiónsskipan, so dampurin og roykurin frá kørunum verður sogin út við stórari megi.

Alt hetta var royndarkoyrt í dag, har Craig, saman við tvíburðunum, Ruben og Telmo stóðu við pottarnar. Vit eru klárir, søgdu Hanus og Craig.

Hvat henda grillbúðin kostar, tori eg ikki at gita, men tað er við vissu ikki smápengar.

Eisini er hølið myndprýtt við Gadus, har Kallurin og James Bond eru i baksýni og so við hini klassisku myndini av hógliga og dugnaliga pápanum, Jógvan í Norðnastovu umborð á Sjúrðarbergi.

Fyrsta árið Craig var í Klaksvík, var í 2015 – Hann gleðir seg sum eitt barn at koma til Sjómannadagin, tó at okkurt árið er gloppið ímillum. Temo hevur verið her áður, meðan hetta er fyrsta árið hjá Ruben.

Graig saman við øðrum reka eina Take Away-grillbúð, sum teir kalla Lewis´s Fish & Grill. Hon liggur í Maidstone, ið er nærhendis London. Teir hava fleiri ferðir vunnið stórar kappingar innan Fish & Chips og verið meistarar í Onglandi.

Her starvast uppá skift 15 fólk. Tá ið eg so spyrji, um grillbúðin er eins stór og tann hjá Hanus, smílist Graig. Hann vísir mær grill-orkuna, sum bert er trý stór kør.

Í mun til øll tey mongu hjá Hanus, sum telja heili 16 frituru-kør, so er meistara-búðin hjá Craig meir at kalla ein lítil kroysa.

Kanska er Hanus meistari í at hava størstu og best útgjørdu grillbúð, uttan at hann veit av tí?

Ongantíð hevur grillorkan verið so stór sum í ár, so nú fer kanska at standa á, at fáa nóg mikið av rávøru til kørini, umvegis Heina Ósá, sum vendur teimum í serligari eggja-blanding og rasp.

Tá ið eg spyrji Craig, hvør er loynidómurin við, at teir so oftani hava vunnið meistaraskapið í Fish & Chips í Onglandi – Er tað mátin, tit gera tað uppá, er tað kryddíir og tað, tit tilseta í raspið? Nei, svarar Craig sannførandi. Størsta orsøkin til, at vit vinna, liggur í tí fantastisku rávøruni, vit fáa frá Hanusi. Hanus er fantastiskur, leggur Craig afturat.

Jú, sanniliga kunnu vit taka undir við Craig, Ruben og Telmo: Hanus er fantastiskur!