At veðurmyndin ikki broytist tað stóra, kemur av einum lágtrýsti, sum hevur parkerað seg vestan fyri Skotland. Tað liggur har og dýpist í dag og í morgin. Týsdagin fer tað at ganga ímóti Íslandi. So er friður, men longu hósdagin fer eitt annað lágtrýst at leggja seg í sama stað, og so byrjar alt umaftur.

Veðrið í vikuni – dag fyri dag:

Í morgin:

Hann kemur lágt allan dagin – t.e., at ættin er sunnan. Um morgunin 5 til 10 m/s, loftið smá- ella hálvskýggjað við sól ella sólglottum. Seinnapartin veksur hann upp í 8 til 13 m/s, enn smáskýggjað men okkurt ælið í støðum. Hitin 10 til 15 stig.

Týsdagin:

Enn suðurætt, 5 til 10 m/s, men viðhvørt eitt sindur meira vindur, 13 m/s. Loftið hálvskýggjað og okkurt ælið. Um náttina gongur hann eysturum til landsynning. Hitin 10 til 15 stig.

Mikudagin:

Veksandi vindur av landsynningi úr 3 til 8 m/s á morgni upp í 8 til 13 m/s á middegi. Allan dagin smá- ella hálvskýggjað og okkurt ælið í støðum. Um náttina samdrigið og regn. Hitin 10 til 14 stig.

Hósdagin:

8 til 13 m/s av eystri, samdrigið og regn. Seinnapartin slítur í og verður klárari, meðan hann gongur niður í landsynning og minkar vindin niður um 5 m/s. Um náttina lítið lot av ymsum ættum og okkurt ælið í støðum. Hitin 10 til 15 stig.

Fríggjadagin:

10 til 15 m/s av útsynningi, skýggjað og regn ella ælaveður. Seinnapartin gongur hann niður í sunnan og minkar vindin niður í 5 til 10 m/s, hálvskýggjað og okkurt ælið í støðum. Hitin 9 til 13 stig.