2. viðgerð og tilhoyrandi atkvøðugreiðslan hava sjálvandi ikki verið enn, men allar tær ábendingarnar, sum higartil eru komnar, siga, at uppskotið um fría fosturtøku fer at verða samtykt við 17 atkvøðum ímóti 16. Hevði Sólvit Nolsøe ikki sagt tingsessin frá sær, hevði hetta lutfallið verið øvugt – uppskotið hevði alt annað líka fallið við 17 atkvøðum ímóti og 16 fyri.

Men av tí at Sólvit E. Nolsøe er farin úr Løgtinginum, fær hann ikki leverað sína atkvøðu til Nei-síðuna og lyft hana upp á 17 og harvið til ein meiriluta. Í staðin fer varamaður hansara, Árni Dam, at levera eina Ja-atkvøðu til mótpartin og harvið at bera málið ígjøgnum.  

Angribolla at fyribyrgja abort?

Spurningurin, sum eftir stendur, er, um tað er møguligt fyri Sólvit E. Nolsøe at taka ein ”angribolla” og taka sætið aftur eftir at hava sagt hann frá sær? Tað sær ikki soleiðis út. Í §62 í Tingskipanini verður tað at siga tingsessin frá sær mett javnt við, at løgtingsfólkið doyr, og §63 hevur bert áseting fyri, hvussu tingfólk í farloyvi taka sætið aftur – og Sólvit er ikki í farloyvi; hann hevur frásagt sær sessin.  

Tað hevði heldur ikki verið neyðugt fyri Sólvit E. Nolsøe at farið úr Løgtinginum. Partakvinnan Hanna Jensen situr framvegis á tingi, og at hon eins og áður er harðliga ímóti broytingini í fosturtøkulógini, kom týðiliga fram undir 1. viðgerð av uppskotinum í dag. Almenningurin veit ikki, um tað í Framsókn er gjørd nøkur roynd at fáa Honnu Jensen at broyta kós í fosturtøkumálinum, men um nøkur tílík roynd er gjørd, er hon í øllum førum miseydnað. So fyri tað kundi Sólvit væl havt verið sitandi og meinað og atkvøtt tað sama sum í fjør.

Herundir sloppið at felt uppskotið um fosturtøku saman við Honnu Jensen fyri 2. ferð.