Magni Garðalíð er 55 ár og úr Vestmanna, men hann flutti til Húsar í 2002, sum eisini var árið hann giftist við Hannebeth. Magni og Hannebeth eiga tvey børn hvør sum øll eru vaksin og sjey barnabørn.

Magni Garðalíð hevur siglt sum kokkur. Hann fæst eisini nógv við ferðavinnu og hevur matstovuna á Kalsoynni. Hann hevur eisini arbeitt við heimleysum innan Frelsunarherin í 8 ár og hevur verið við í stóra arbeiðinum, sum verður gjørt fyri heimloysi í Umsorganarheiminum Gloria.  

Magni Garðalíð er royndur í lokalpolitiskum høpi, og hann var seinasti borgarstjóri í Húsa kommunu, har hann var borgarstjóri í tvey skeið, áðrenn lagt varð saman við Klaksvíkar kommunu. Eisini hevur hann sitið sum varðalimur í býráðnum seinastu fýra árini.

Sjálvur sigur Magni soleiðis:
Eg ynski at arbeiða fyri, at tað verður liviligari í smáu bygdunum, og at tær verða fríðkaðar í samráð við borgaran.

Umráðandi er eisini, at spillivatnsskipan verður gjørd, har hon manglar. Eisini skal grøn orka raðfestast nógv hægri, og vit skulu framhaldandi arbeiða við, at kommunan verður so grøn sum gjørligt.

Tað er eisini av stórum týdningi, at børnini, sum búgva á útoyggjum fáa møguleika til at ganga í fólkaskúla upp í 7. flokk á oynni.

Føroyska ferðavinnan er vaksandi, og tað eru fleiri, sum hava góð hugskot og gott áræði, tí haldi eg, at tað er av stórum týdningi, at spýrar í smáu bydgunum fáa tann stuðulin, sum teimum tørva fyri at fáa hugskot til veruleika og veruleikan at mennast.