Lýsing
Lýsing
Lýsing

Frítíðarkortið í royndartíð, takk!

SKRIVAÐ: Hjalmar Zachariassen  |  02.09.2024 - 06:00 Politikkur Tíðindaskriv

Frítíðarkortið kann tryggja øllum børnum og ungum í Klaksvíkar Kommunu javnbjóðis atgongd til ítróttar- og frítíðarvirksemi.

 

 

Frítíðarkortið – Hvat er tað?

Í nøkur ár hava nakrar kommunur í Føroyum roynt seg við frítíðarkortinum. Frítíðarkortið er ein skipan, sum lutar út kort til børn og ung, sum geva teimum ókeypis atgongd til frítíðarvirksemið í kommununi. Eigarin av kortinum fær eina ávísa upphædd, sum hann ella hon kann brúka til at rinda fyri lima- og luttøkugjøld í sambandi við ítróttar- og frítíðarvirksemi.

 

Endamálið við frítíðarkortinum

Endamálið við hesi skipan er at eggja fleiri børnum og ungum at gerast virkin í ítróttar- og frítíðarvirksemi. Ofta verður tikið fram, at tað er fíggjarliga tyngjandi hjá nógvum barnafamiljum, tá ið børnini vilja luttaka í fleiri frítíðaraktivitetum. Við einum frítíðarkorti ber til at tryggja, at øll børn hava møguleika at luttaka í einum ella fleiri frítíðarítrivum.


Vit í Sjálvstýri halda, at tað er upp á tíðina, at Klaksvíkar Kommuna fer at royndarkoyra slíka skipan í nøkur ár. Orsøkirnar eru fleiri:

 

Lættari atgongd fyri øll

Øll børn og ung í kommununi fáa lættari atgongd til ítróttar- og frítíðarvirksemi. Øll fáa tryggjað ein møguleika at vera við, uttan mun til fíggjarligan status. Hetta kann vera serliga hent fyri at fáa útlendskar tilflytarar at luttaka í felagslívinum, umframt at tað kann fáa fólk úr øðrum kommunum at flyta higar.

 

Meiri luttøka og sambond

Sannlíkt er, at fleiri velja at luttaka í meira enn einum frítíðarvirksemi. At børn og ung eru við í meira enn einum frítíðarvirksemi skapar meira virksemi og sambond. Vit eggja til spennandi alternativ til stóru skermnýtsluna.

 

Vøkstur í feløgum og nýggj tilboð

Fleiri feløg fara at uppliva, at limatalið hækkar, sannlíkt eisini virksemið.
Tað er eisini sannlíkt, at fleiri frítíðartilboð verða stovnað, tá ið tað kann gerast eitt sindur lættari at fáa limir og eitt fíggjarligt íkast til virksemið.

 

Vansar við skipanini – tí er royndartíð neyðug

Sjálvandi eru tað eisini vansar við einari slíkari skipan, tí vilja vit seta hesa skipan í verk fyrst í eina royndartíð, so at vit kunnu eftirkannað, hvat árin hon hevur.

 

Møguligir vansar – og hvussu teir kunnu minkast

Tað kann millum annað hugsast, at feløg seta limagjaldið upp, og tey, sum hava eitt sera høgt limagjald, fara avstað við størsta partinum av kakuni. Til tess kann man seta eitt loft – t.d. at í mesta lagi 1/3 av frítíðarkortinum kann brúkast uppá eitt felag.

Kommunan má eisini seta treytir fyri, hvør kann vera við og hvør ikki, so at skipanin ikki verður brúkt til annað enn tað, hon er ætlað til, nevniliga at tryggja luttøkumøguleikar og økja útboðið.

 

Fyrimunirnir viga tyngri

Verður rætt borið at, so skulu fyrimunirnir nokk viga meira enn vansarnir. Vit koma at síggja eitt breiðari úrval av frítíðaraktivitetum og eina størri luttøku. Soleiðis kann Klaksvíkar Kommuna vera eitt stað fyri øll talent.

 

Hjalmar Zachariassen
Sjálvstýri

 

Lýsing
Seinastu tíðindini
Upptakt: KÍ-Víkingur
Team Klaksvík tapti fyrsta dystin
Ungur klaksvík­ingur keypt sær útróðrarbá…
Veðrið í Vikuni
Ársaðalfundur - Norðoya Listafelag
KÍ kvinnur - Skála (7-0)
Mjølnir vunnu FK kappingina
Føroya Byggifrøðinga­felag 50 ár
Team Klaksvík spælir fyrsta lands­kapping…
Innkomna peninga­upphæddin í ár er 1.590.…
Mjølnir sett ítróttar­stjóra
Morgunmatur og familjuguds­tænasta
Viðgerðartrygd verður raðfest
Álit er norð­urlendska gullið
Óneyvar og loyniligar sjúklingaskráir -…
Epli og gularøtur av Sandi
Nú byrjar hondbóltskappingin
Klaksvíkar Kommuna tapir kapping­ina um b…
Norðoya Bátafelag byrjar nú uppá vetrars…
Elsebeth Mercedis: Steðgið nú við fleiri…