Framløgurnar vóru fjølbroyttar og áhugaverdar, og serliga var áhugavert, at so nógv ymisk fólk høvdu orðið og settu orð á avbjóðingar og loysnir við trongu støðuni á bústaðarmarknaðinum.

Har vóru umboð fyri myndugleikar, fíggingarstovnar og byggiharrar, umframt fólk, sum beinleiðis eru rakt av bústaðartrotinum, politikarar og onnur áhugað, sum øll høvdu gjørt sær greiðar tankar um støðuna.

Olav Guttesen, stjóri í Betri Banka, legði fyri við at greina bústaðarstøðuna í Føroyum, har tað vísir seg, at tað resta minst 1.000 búeindir í mun til fólkatalið, um marknaðurin skal vera á sama støði sum fyri 10 árum síðan og enn meira, um samanborið verður við okkara grannalond.

Jógvan Ósá, tekniskur stjóri í Klaksvíkar kommunu – tilstundandi stjóri á Bústaðir, greiddi frá arbeiðinum, sum seinastu árini er gjørt í kommununi fyri at betra um møguleikarnar fyri bygging. Millum annað vísti hann á týdningin av at byggja tætt í einum øki sum í Klaksvík, har byggilendið er avmarkað.

Hervør Pálsdóttir, forkvinna í rættarnevndini, sum hevur bústaðarmál um hendi í løgtinginum, lýsti átøkini, sum landspolitiska skipanin hevur arbeitt við og fer at arbeiða við komandi tíðina.

Ein partur er tænastugjøld á hús, meðan ein meira grundleggjandi partur er at dagføra bústaðarpolitikkin hjá landinum, soleiðis at møguleikarnir hjá ungum at seta búgv í Føroyum batna.

Anfinn í Toft, valevni til býráðsvalið fyri Tjóðveldisflokkin, hevði seinastu framløguna á kvøldinum, har hann serliga legði dent á týdningin av at skapa karmar fyri, at meira verður bygt komandi árini, enn tað hevur verið seinastu árini.

Eftir framløgurnar umrøddi fundarfólkið fyrimunir og vansar við átøkum, sum kunnu broyta upp á støðuna á bústaðarmarknaðinum.

Eitt áhugavert og upplýsandi tiltak, sum hevði heitið; Tak yvir høvdið.