Tað gjørdist ein rættiliga undirhaldandi dystur, tá kvinnurnar hjá Stjørnuni í dag tóku í móti EB. Tað gekk ógvuliga javnt á allan fyrra hálvleik, liðini skiftust um at skora, tó var tað EB sum hevði munin. Tá leiktir vóru 17 min. var støðan 6-9 til EB, men so svaraði Stjørnan aftur, og tá farið varð til hálvleiks, stóð á jøvnum 13-13.

Fyrstu løtuna av seinna hálvleiki, gekk eisini javnt á, men sum hálvleikurin leið, hevði Stjørnan hug at draga frá, serliga var tað verjan hjá Stjørnuni sum stóð væl, soleiðis at EB hevði trupul við spæla seg gjøgnum til upplagdar málmøguleikar, samstundis sum at málverjin hjá Stjørnuni hevði fleiri góðar bjargingar. Endaliga úrslitið gjørdist ein greiður 32-25 sigur til Stjørnuna.

Stuttligt at síggja, at flestu av leikarunum hjá Stjørnuni komu á málskjúttaralistan.

Málini hjá Stjørnuni skutu: Tóra Eliasen 9, Durita K. Ljósstein 5, Mina S. Hendriksen 5, Miriam Bethuelsdóttir 5, Jancy J. Poulsen 4, Bergit Svaradal 2, Ella L. Samson 1 og Joan Sørensen 1