Hetta til hósdagin fer køld luft at reka ímóti okkum av landnyrðingi ella norði – ælaveður er uppií viðhvørt. Lágtrýstini fara eystureftir sunnan fyri Føroyar og fara at halda til í Norðsjónum ella har um leiðir. Tí fara vit at liggja, har sum tann kalda luftin av leiðunum langt norðanfyri streymar suðureftir.

Hósdagin og fríggjadagin fer ein hátrýstryggur at leggja seg um okkara leiðir. Tá er veðrið vanliga nakað væl betri. Tað fer tað eisini hesaferð – tó undantikið onkra løtu hóskvøldið og fríggjanáttina.

Veðrið í vikuni – dag fyri dag:

Mánadagur:

Lot til frískan vind norðan, 3 til 10 m/s, klárt ella smáskýggjað og yvirhøvur turt. Seinnapartin veksur hann vindin upp í frískan vind upp í strúkur, 8 til 13 m/s, hálvskýggjað og kanska okkurt kavaælið. Um náttina gongur hann eysturum og minkar niður í frískt lot til frískan vind, 5 til 10 m/s, skýggjað og yvirhøvur turt. Hitin úr frostmarkinum upp í 5 stig.

Týsdagur:

Minkandi vindur fyrrapartin úr einum frískum loti til frískan vind av landnyrðingi, 5 til 10 m/s, niður í eitt lítið lot, minni enn 5 m/s, meðan tað er hálvskýggjað og yvirhøvur turt. Seinnapartin hækkar hann upp í norðan, og um kvøldið veksur hann til lot til frískt lot, 3 til 8 m/s, og okkurt ælið í støðum. Hitin úr frostmarkinum upp í 5 stig.

Mikudagur:

Frískt lot til frískan vind av útnyrðingi, 5 til 10 m/s, klárt ella smáskýggjað og okkurt ælið. Hitin úr einum stigi undir frostmarkinum upp í 4 stig.

Hósdagur:

Frískt lot til frískan vind av útnyrðingi, 5 til 10 m/s, sum fyrrapartin minkar niður í eitt lítið lot og gongur niður í sunnan. Um kvøldið veksandi upp í frískan vind upp í hvassan vind sunnan, 10 til 15 m/s, samdrigið og regn. Fríggjanáttina støkkur hann vesturum. Hitin úr frostmarkinum upp í 7 stig.

Fríggjadagur:

Minkandi vindur fyrrapartin av útnyrðingi niður í frískan vind upp í strúk, 8 til 13 m/s, sum frálíður smáskýggjað og turt. Seinnapartin minkandi niður í lot til frískt lot, 3 til 8 m/s, og um kvøldið niður í eitt lítið lot, minni enn 5 m/s, meðan ættin gongur niður í sunnan. Hitin 2 til 8 stig.