Mánadagin og týsdagin fer eitt hátrýst at liggja um okkara leiðir, og tá er vanliga gott veður við lítlum vindi og nokkso klárum lofti. Ættin fer at liggja um sunnan.

Mikudagin og fram til vikuskiftið fara lágtrýst at royna at leypa á her hjá okkum, men eitt hátrýst yvir Eysturgrønlandi fer at halda tað vekk. Ættin fer at liggja um landsynning.

Lítil vindur alla vikuna av suðuri ella landsynningi fer at hava skiftandi loft við sær í Føroyum. Í støðum, sum venda ímóti ættini er stórur møguleiki fyri mjørka. Í støðum, sum eru vard fyri lotinum av fjøllum ella øðrum oyggjum kann gott fara at vera klár luft við sólskini. So er tað støðini, har sum loftið fer at vera eitt sindur av hvørjum.

Veðrið í vikuni – dag fyri dag:

Mánadagur:

Lot til frískt lot sunnan, 3 til 8 m/s, skýggjað og kanska okkurt ælið í støðum fyrrapartin. Týsnáttina gongur hann eysturum til landsynning. Hitin 2 til 7 stig.

Týsdagur:

Lot til frískt lot av landsynningi, 3 til 8 m/s, skiftandi skýloft og yvirhøvur turt. Hitin 3 til 8 stig.

Mikudagur:

Lot til frískt lot eystan, 3 til 8 m/s, skiftandi skýloft og bert okkurt ælið í støðum. Hitin 2 til 7 stig.

Hósdagur:

Lot til frískt lot eystan, 3 til 8 m/s, skiftandi skýloft og bert okkurt ælið í støðum. Um kvøldið frískt lot til frískan vind, 5 til 10 m/s. Um náttin minkar vindurin aftur niður í lot til frískt lot, 3 til 8 m/s. Hitin 2 til 7 stig.

Fríggjadagur:

Lítið lot av landsynningi, minni enn 5 m/s, samdrigið og yvirhøvur turt. Hitin 2 til 6 stig.