Eitt hátrýst er yvir Eysturgrønlandi, og tað sendir luftina suður við norsku strondini og síðani til Føroya. Hetta mynstrið í veðrinum fer at vera í nakrar dagar afturat.

Í dag er ættin aftur eystan, vindferðin er 5 til 10 m/s. Loftið er samdrigið, og okkurt ælið er kring oyggjarnar.

Hitin er 4-5 stig, har hann er mestur. Fer kanska 1 stig longur upp seinni í dag. Náttarhitin er um 2 stig, og tí er hvítt í erva.  

Veðrið fer ikki at broytast tað stóra í dag – uttanso at onkra løtu er tætt millum ælini, og aðra løtu er langt millum ælini. Í aðrar mátar fer veðrið at vera sum tað hevur verið í morgun.

Løturnar, ælini eru, er eitt sindur meira vindur. Tá ælið er farið, er aftur 5 til 10 m/s. Tað er ymiskt, hvussu ælini fordeila seg kring landið – í nógvum støðum helst einki ælið yvirhøvur, meðan onnur fáa meiri enn sín part.

Í morgin er hann aftur eystan, og vindferðin eisini 5 til 10 m/s – og okkurt ælið her og har. Líkist nógv degnum í dag – og í gjár. Hitin í morgin 2 til 5 stig.

Sunnudagin næstan sama veður. 5 til 10 m/s av eystri, men hann fer at hava hug at vera eitt sindur meiri vindur onkra løtu, 8 til 13 m/s. Eitt sindur meira avfall sunnudagin enn í dag og í morgin – tættari millum ælini – og í teimum kundi meiri enn so hent, at tað er vátakavi. Hitin aftur millum 2 og 5 stig.

Gott vikuskifti.