Leiðin hjá lágtrýstunum hesa vikuna er vestan fyri Føroyar, har tey ganga í landnyrðing. Vit liggja tí eystan fyri miðjuna á teimum, har sum ættin vanliga liggur millum sunnan og vestan, og har sum brúgvaløgini við øllum avfallinum eru.

Og tað er júst tað vit fara at merkja hesa vikuna.

Veðrið í vikuni – dag fyri dag:

Mánadag:

Um morgunin hvassur vindur ella skrið av útsynningi, 15 til 20 m/s, við hørðum hvirlum og skiftandi skýloft saman við ælaveðri. Út á dagin minkar hann vindin niður í frískan vind til hvassan vind, 10 til 15 m/s. Hitin 4 til 8 stig.

Týsdag:

Frískur vindur upp í strúk vestan, 8 til 13 m/s, í støðum upp í hvassan vind, 15 m/s, skiftandi skýloft og ælaveður, í støðum kanska heglingur. Hitin millum 4 og 7 stig.

Mikudag:

Frískt lot til frískan vind av útsynningi, 5 til 10 m/s, sum seinni veksur upp í ein strúk í vindi vestan ella av útysnningi, 13 m/s. Skýloftið verður aftur skiftandi við ælaveðri, í støðum kanska vátakavi ella heglingur. Hitin millum 3 og 6 stig.

Hósdag:

Frískur vindur upp í strúk vestan ella av útsynningi, 8 til 13 m/s, skiftandi skýloft og ælaveður, í støðum kanska heglingur. Hitin 3 til 6 stig.

Fríggjadag:

Frískur vindur upp í strúk sunnan, 8 til 13 m/s, seinni hvassur vindur, 15 m/s. Fyrrapartin sólglottar og turt fyri tað mesta, men sum frá líður verður samdrigið og regn vestaneftir. Hitin millum 4 og 8 stig.