Oldurabbi Bjarna Samson fiskaði í Barentshavinum. Langabbi Bjarna, Andrass Samson sigldi við Skálabergi. Sama gjørdi Samson Samson, abbi Bjarna. Og Bjarni hevur eisini verið til sjós í Barentshavinum saman við pápanum Jógvan.

Soleiðis er hann barentshavsmaður í fimta ættarlið. Og síðani Bjarni fór úr tíggjunda flokki í 1998, hevur hann mynstrað við trolarum, sum hava roynt á somu fiskileið. Í ár hevur 42 ára gamli Bjarni sostatt 25 ára starvsdag í Barentshavinum. Tá er túrurin í summarfrítíðini í 1996 ikki taldur við, tá var hann einans 15 ára gamal.

Og Bjarni er eisini umborð á Emerald, tá eg fái orð á hann yvir Messenger. Saman við 10 ára gamla soninum Jógvan var hann tá í ferð við at sigla nýbygningin heim frá skipasmiðjuni í Istanbul til Føroya. Ein 14 dagar drúgvur túrur, har feðgarnir báðir valdu at brúka fríløturnar at byggja eina modell av Titanic gjørdan úr fleiri enn 9.000 lego kubbum. Eygagóði sonurin hevur fingið eitt minni fyri lívið, nú teir saman hava bygt eitt legoskip úr so nógvum kubbum.

Átta ára gamli Jógvan vísir stoltur nýbygda legoskipið av Titanic fram. MYND: Benjamin Rasmussen

Fyri átta ára gamla Jógvan og pápa hansara er legoskipið eitt varandi minni um eina góða felags uppliving, har enn eitt nýtt kapittul hjá føroyska fiskiskipaflotanum í Barentshavinum byrjar. Seinni í mánaðinum fer Bjarni væntandi fyrsta túrin við Emerald í russiska partinum av Barentshavinum. Emerald hevur verið royndartúr, eftir at nýbygningurin kom til landið tann 13. juli 2023. Har skulu gerast nakrar tillagingar í fabrikkini, áðrenn klárt er til fyrsta veruliga túrin.

Stór samrøðugrein verður í Norðlýsinum, sum kemur út komandi mánadag. 

Bjarni Samson, verksmiðjuformaður, í stásiligu verksmiðjuni til bæði rækju-, flaka- og mjølframleiðslu umborð á Emerald. MYND: Benjamin Rasmussen