Á hesari konsertini spæla tveir tónleikarar úr London Symphony Orchestra saman við seks føroyskum tónleikarum. Á skránni er oktettin eftir Franz Schubert, ið verður mett sum eitt tað týdningarmesta kamartónleikaverkið úr romantiska tíðaskeiðnum.
‍

Tónleikarar:

• Chris Richards, klarinett
• Joost Bosdijk, fagott
• Niklas K. Mouritsen, horn
• Heiðrun Petersen, violin
• Jón Festirstein, violin
• Angelika Hansen, viola
• Kristina á Váli, sello
• Andrias V. Poulsen, bass

‍
Í 1824 var Franz Schubert 27 ára gamal og hevði bert fýra ár eftir at liva. Árini frammanundan hevði hann upplivað eitt slag av skapanarkreppu. Hann hevði roynt seg sum operatónaskald – uttan stórvegis eydnu. Og fleiri av verkum hansara vóru løgd til viks, áðrenn tey gjørdust liðug. Kendasta dømið er hin ófullfíggjaða symfoniin, sum varð skrivað í 1822.
 
Schubert hevði ovurstóra virðing fyri Beethoven. Hetta elvdi til, at hann viðhvørt ivaðist í egnum mátti og førleikum. Men í februar 1824 sýnist hann at hava vunnið á ivanum. Eftir stuttari tíð skrivaði hann eitt stórt kamar-tónleikaverk í seks satsum fyri klarinett, fagott, horn, tvær violinir, viola, sello og kontrabass.
Schubert skrivaði sjálvur í brævi: ”á henda hátt vil eg bróta mær slóð fram at teirri stóru symfoniini”

Konsertin er fingin í lag við altjóða kamartónleikastevnuna Endurljóð og er í 55 minuttir.

Atgongumerki fáast á torsgota.fo