KÍ hevur eina leiðsla á 2-0 frá fyrra dystinum. 2-0 verður ofta sagt at verða vandamiklasta leiðslan í fótbólti og samstundis er stórur munur ofta á heimavølli og útivølli í altjóða dystum, hóast KÍ fyrstu umførini í fjør fekk betri úrslit á útivølli enn á heimavølli.

Hjá KÍ er Jóannes K. Danielsen tøkur aftur eftir leikbann. René S. Joensen og Odmar Færø komu inn seinast og eru kanska klárir til meira spælitíð nú. Hinvegin er ivamál um Cedric Yambere, sum fór skaddur av vøllinum seinast. Hann er við á ferðini. Jákup B. Andreasen, Mads Bo Mikkelsen og Jonn Johannessen eru skaddir.

Dysturin í Luksemborg byrjar kl. 18.00. Dómari verður Javier Alberola Rojas úr Spania.