Hans Eiler signerar í ALFA Bókhandil leygardagin frá kl. 11.00
Leygardagin ber til at fáa eitt prát og at signera nýggju bókina hjá Hans Eiler Hammer í Alfa Bókhandil. Møguleiki verður at heilsa upp á høvundin frá kl. 11.00 leygardagin.
Í hesum døgum gevur Hans Eiler Hammer, fyrrverandi prestur í Klaksvík, bók út við heitinum ”Lítur aftur um bak”.
Hans Eiler Hammer búði síni barnaár bæði á Argjum og í Klaksvík, og foreldur hansara vóru trúboðarar í KFUM & K. Hann hevur eisini búð á Tvøroyri, men kom so aftur at ganga í 9. og 10. flokki í Klaksvík. Nakað seinni fór hann at lesa gudfrøði og kom til Klaksvíkar at vera prestur árini 1998-2006. Síðani flutti hann til Noregs, har hann áður hevði lisið og hitt konu sína. Hann var prestur í knapt 5 ár í Norður-Noregi.
Randi Benedikte Mohr hevur skrivað spurningar og Hans Eiler hevur svarað. Randi hevur føroyska mammu, er uppvaksin í Danmark og útbúgvin á Danmarks Journalisthøjskole. Hon hevur áður arbeitt á BT, millum annað á Christiansborg. Hon býr í Føroyum og skrivar serliga fyri Ritzau um føroysk viðurskifti. Hetta er hennara fyrsta bók.