Seinnapartin mikudagin varð Lesaravirðislønin latin á Bókasavninum við Løkin í Runavík. Vinnarin av virðislønini var bókin "Lygn", sum Eyðun Klakstein hevur skrivað.

Við grundarlagi í útlánstølunum hjá bókasøvnunum í fjør vóru tríggjar bøkur í uppskoti til virðislønina. Umframt "Lygn" vóru tær "Sára Malena" eftir Sólrun Michelsen og "Vilstar røtur" eftir Ingun Christensen. Allan februar kundu fólk atkvøða millum hesar tríggjar bøkur.

Á almennum tiltaki í Runavík handaði Annika Egholm, bókavørður á Klaksvíkar bókasavni, Eyðuni Klakstein virðislønina, sum er 30.000 krónur. Noomi Reinert las eitt brot úr bókini, og Kári Sverrisson spældi nakrar sangir. 

Hetta er aðru ferð, at Lesaravirðislønin verður latin. Í fjør fekk Høgni Mohr virðislønina fyri bókina Saga JAM. Ta ferðina var virðislønin handað á bókasavninum í Klaksvík.