Telvað verður suðuri við Svarta Havið í georgiska høvuðsstaðnum Batumi. 39 lond verða við.  

Føroyar eru styrkismettar nummar 36.  Miðalstyrkitalið hjá føroyska liðnum er 2323. Tey trý londini, sum eru styrkismett niðari, eru Kosovo (2310), Skotland (2214) og Írland (2164). Týskland, Holland og Ungarn eru styrkismett ovast. 

Føroyska landsliðið manna hesir fýra:

1. IM Høgni Egilstoft Nielsen, ST 2389
2. Luitjen Akselsson Apol, HT 2318
3. Rógvi Egilstoft, ST 2309
4. Martin Poulsen, HT 2276

Kappingin byrjar sunnudagin 5 oktober. Níggju umfør eru, telvað verður til týsdagin 14 oktober. Einasti frídagurin er leygardagin 11 oktober.
 

Helgi ikki við

Føroyski stórmeistarin, Helgi Dam Ziska, verður ikki við. Helgi var heldur ikki við í seinastu EM-stevnuni fyri tveimum árum síðani. Knúturin var tá ein træta um samsýning, men tann knúturin varð seinni loystur millum Talvsambandið og stórmeistaran, og Helgi var við á landsliðnum á talvolympiaduni í Ungarn í fjør.

Hesaferð er eingin ósemja. Føroyska talvlandsliðið hevur tvær kappingar í heyst, umframt EM nú í oktober, er onnur kapping í november. Tá hýsir Kýprós kappingini fyri smátjóðir í Evropa, og tá verður stórmeistarin við á føroyska landsliðnum. Ein samanrenning av arbeiðsviðurskiftum, familjulívi og ólagaligari ferðing til Batumi, tá talvolympiada var har í 2018, fingu Helga at setast aftur hesaferð. 

Fjórða EM

Mótstøðan er ógvuliga hørð í EM. Harðari enn í OL. EM-stevnan fyri talvlandslið er sum eitt stórt endaspæl. Í EM eru næstan bara sterkari lond at kappast við. Tey, sum vit møta í smálandakappingini, eru ikki við í EM. Tí er tað missur, ið merkist, tá okkara besti telvari ikki er við.

Hetta verður fjórða ferðin, at Føroyar eru við í EM. Kappingin er annaðhvørt ár. Í 2023 var kappingin í Montenegro. Tá endaðu Føroyar nummar 37 av 38 londum. Føroyar vóru styrkismettar nummar 36. Vit fingu tá Skotland afturum okkum.

Bestu úrslitini vóru:

Føroyar - Skotland 3½ - ½
Føroyar - Finnland 2 - 2
Føroyar - Kosovo 2- 2.

Úrtøkan hjá føroysku telvarunum í seinasta EM var:
1. borð: Høgni Egilstoft Nielsen 3½/9
2. borð: Martin Poulsen 3/9
3. borð: Rógvi Egilstoft 3½/9
4. borð: John Rødgaard 4/9

Kreta og Reykjavík

Føroyar vóru ikki við í EM í 2021 og ei heldur í 2019.  

Í 2017 var telvað á Kreta. Tá gjørdust Føroyar nummar 36 av 40 liðum. Føroyska liðið var styrkismett nummar 35.

Í EM 2017 á Kreta var úrtøkan hjá føroysku telvarunum henda:

1. borð: GM Helgi Dam Ziska 4½/7
2. borð: Høgni Egilstoft Nielsen 3½/9
3. borð: Rógvi Egilstoft 4½/8
4. borð: IM John Rødgaard ½/6
5. borð: IM John Arni Nilssen 1½/6.

Fyrsta EM-ævintýrið var í Reykjavík í 2015 - í Laugardalshøllini, har Fischer og Spasski í 1972 telvaðu um HM-heitið.

Føroyar endaðu nummar 34 av 36. Úrslitið var í samsvari við styrkismetingina. Besta dystarúrslitið var 2 - 2 javnleikurin móti Danmark. Helgi vann prestisjudystin á 1. borði móti Sune Berg Hansen.

Føroyska einstaklingsúrtøkan í EM 2015 í Reykjavík var henda:

1. borð: IM Helgi Dam Ziska 4½/8
2. borð: IM John Rødgaard 1½/7
3. borð: Høgni Egilstoft Nielsen  2/7
4. borð: Rógvi Egilstoft 4/8
5. borð: IM John Arni Nilssen 1/6

Landskappingin byrjar í næstum

Nú talvlandsliðið er í eldinum í alt heyst, er verri at leggja heimligu landskappingina. Uppskot um leikskrá er í løtuni til hoyringar hjá feløgunum.

Gongst sum ætlað, verður byrjað um miðjan oktober. Skráin kemur væntandi út ein av fyrstu døgunum. Helst verða færri leikdagar hesumegin ársskiftið enn eftir nýggjár. Leikumførini eru sum vant tíggju í alt.

Annars er  at siga, at landsliðið til smálandakappingina í Kýprós í november er eisini sett. Talvsambandið hevur hesaferð avrátt, at tveir ungir telvarar skulu sleppa við. Í alt verða fimm telvarar á liðnum.

Hesir fara at umboða Føroyar á Kýprós seinni í heyst:

1. GM Helgi Dam Ziska
2. IM Høgni Egilstoft Nielsen
3. Luitjen Akselsson Apol
4. Jón í Horni Nielsen
5. Elias Petersen