Ein lætti til barnafamiljur
Sum kommunalur politikari vil eg arbeiða fyri at tryggja, at okkara børn og ung hava allar møguleikar at liva eitt aktivt og sunt lív
Trivnaðurin hjá borgaranum er lykilin til eitt gott samfelag. Ein kommunal uppgáva er at skapa karmar, ið tryggja, at børn og ung hava bestu møguleikar at menna seg og trívast. Í Klaksvíkar kommunu hava vit óteljandi møguleikar at styrkja trivnaðin hjá okkara yngstu borgarum – serliga við at innføra eitt frítíðarkort, sum hevur verið ein vælvirkandi skipan í fleiri øðrum kommunum.
Javnbjóðis møguleikar fyri øll børn
Eitt av stóru fyrimununum við frítíðarkortinum er, at tað gevur øllum børnum og ungum javnbjóðis møguleikar at taka lut í ítrótti, mentan, og øðrum frítíðarvirksemi, óansæð fíggjarligu støðuna hjá teirra familjum. Hetta er ein týðandi íløga í okkara samfelag. Um vit tryggja, at øll børn hava atgongd til somu tilboð, kunnu vit eisini tryggja, at øll hava møguleika at menna seg og fáa eina góða byrjan á lívið.
Við frítíðarkortinum fáa øll børn møguleika at luttaka í virksemi, sum styrkir teirra likamliga og sálarliga heilsu. Í staðin fyri, at summi børn ikki kunnu luttaka orsakað av fíggjarligum forðingum, gevur kortið øllum børnunum javnbjóðis møguleikar at fylgja sínum áhugamálum og gerast ein virkin partur av felagsskapum í kommununi. Hetta skapar eina meiri samhugaða býð, har eingin kennir seg útilokaðan frá felagsskapinum orsakað av búskaparligum avbjóðingum.
Íløga í trivnað og heilsu
Frítíðarkortið er ikki bert ein fíggjarlig hjálp, tað er ein íløga í framtíðina hjá okkara børnum. Vit vita, at børn, sum hava møguleika at vera virkin í frítíðartilboðum og ítróttum, bæði mennast betur sálarliga og fáa ein sunnan likamliga lívsstíl. Hetta er ikki bert ein fyrimunur fyri einstaka barnið, men fyri alla kommununa, tí virkin børn og ung eru minni fyri vandanum at fáa likamliga og sálarliga trupulleikar í framtíðini.
Við frítíðarkortinum kunnu vit eggja børnunum at nýta meiri av teirra tíð til ítrótt og mentan heldur enn at sita framman fyri ein skerm. Hetta kann eisini hjálpa teimum at menna sosialar førleikar, tí tey gerast partur av felagsskapum og arbeiða saman við øðrum. At kunna luttaka í fleiri sløgum av virksemi, sum teirra foreldur kanska annars ikki høvdu havt ráð til, gevur teimum eina breiðari menning.
Fíggjarlig avlastning til familjur
Nógvar familjur í Klaksvíkar kommunu hava fleiri børn, og tá skal ofta væl meira enn eitt frítíðarvirksemi fíggjast. Frítíðarkortið, við eini upphædd á td. 2.000 krónur per barn, ger tað møguligt hjá familjum at lata síni børn ganga til fleiri frítíðar- og ítróttartilboð uttan at hava stóra fíggjarliga byrðu. Hettar er serliga týdningarmikið fyri familjur við fleiri børnum ella familjur við lágari inntøku.
Kortið avloysir eina møguliga hækking av barnafrádráttinum og gevur pengarnar beinleiðis til nakað, sum kemur børnunum til góðar. Soleiðis verða pengarnir brúktir uppá menning og trivnað hjá børnunum og tryggja, at tey fáa nøktandi tilboð innan ítrótt og skapandi virksemi.
Stimulering av lokalum felagsskapum
Ein annar týdningarmikil partur av frítíðarkortinum er, at tað eisini stuðlar lokalum felagsskapum, so sum ítróttarfeløg, tónleikaskúlar og onnur frítíðartilboð í Klaksvík. Við at geva fleiri børnum møguleika at luttaka, kunnu vit eisini tryggja, at hesi feløg fáa fleiri limir og verða enn meira virkin í lokalum umhvørvi.
At styrkja lokal frítíðarvirksemi hevur eisini longri tíðarskeiðs ávirkan á trivnaðin hjá kommununi sum heild. Fleiri virknir limir í feløgunum merkir, at vit fáa eina sterkari kenslu av felagsskapi, og at fleiri foreldur og borgarar gerast virknir partar av hesi skipan. Hetta skapar eitt positivt samband millum lokal virksemi og trivnaðin hjá borgarunum.
Burðardygg menning og trivnað í framtíðini
Við frítíðarkortinum gera vit eina burðardygga íløgu í trivnaðin hjá børnunum og ungu í kommuni. Vit tryggja, at børnini fáa bestu fortreytirnar fyri at trívast og menna seg, og samstundis stuðla vit undir eina sunnari og meira virka framtíð.
Sum kommunalur politikari vil eg arbeiða fyri at tryggja, at okkara børn og ung hava allar møguleikar at liva eitt aktivt og sunt lív. Frítíðarkortið er ein praktisk loysn, ið gevur okkara børn ein javnan møguleika at mennast ígjøgnum mentan, ítrótt og annað skapandi virksemi, sum fer at stuðla undir trivnað og menning – bæði hjá einstaklingunum og samfelagnum sum heild.
Álvur M. Zachariasen - Ein spíri úr sterkari rót.
Valevni fyri lista D til kommunuvalið 12 novembur í Klaksvík